TEMPO Norsk

Språk er ei superkraft og nøkkelen til deltaking, jobb og integrering. For mange som skal lære norsk tek det for lang tid å nå eit norsk bruksspråk som gjer at dei kan delta fullt ut i arbeidslivet og samfunnet. TEMPO Norsk er utvikla for å auke farten på denne prosessen. Dess raskare ein kjem over minsteterskelen for språkbruk, dess raskare utviklar ein språket vidare – noko som både styrkjer integreringa, reduserer risiko for utanforskap og gjev det lokale yrkeslivet tilgang til viktig kompetanse som i dag kan gå tapt bak ei språkbarriere.

TEMPO Norsk er basert på ein metode utvikla av ein erfaren lærar. Gjennom systematisk, praktisk og målretta språkopplæring på A1-nivå, blir deltakarane raskt i stand til å bruke norsk i kvardagen. Opplæringa er intensiv, fokusert på bruksspråk, og blir prototypa saman med fleire samarbeidspartnarar i Nordfjord. Konseptet handlar ikkje berre om grammatikk og ordforråd – det handlar om å bruke språket aktivt i reelle situasjonar, slik at læringa blir relevant, motiverande og effektiv. Målet er å standardisere metoden slik at han kan nyttast breitt i norskopplæringa.

TEMPO Norsk er ein del av Jakta-modellen og jobbar tett med både lokalt næringsliv, frivillige og offentlege aktørar for å sikre at deltakarane får praktisk trening, nettverk og raskare veg ut i jobb. Når fleire får språket på plass tidleg, aukar sjansen for både fagleg utvikling, inkludering og rekruttering til Nordfjord. Konseptet vil vere eit godt supplement til eksisterande norskopplæring og opplæringsmateriell, og eit verktøy for å gjere Nordfjord suprare – raskare.